काठमाडौं, १४ मङ्सिर- काठमाडौंबाट अर्घाखाँची सन्धिखर्कतर्फ जाँदै गरेको बस बुधबार बिहान त्रिशूलीमा खस्यो । चितवनको फिस्लिङ पुग्दा विपरीत दिशाबाट आइरहेको ट्रकसँग ठोक्किएर उक्त दुर्घटना भएको थियो । दुर्घटनामा सात जनाको ज्यान गयो । गएको ४ कात्तिकमा पनि राजविराजबाट आएको रात्रिबस त्रिशूलीमै दुर्घटना हँुदा ३४ जनाको ज्यान गएको थियो ।
त्रिशूली नदीमा अहिलेसम्म कति व्यक्तिले सवारी दुर्घटनामा ज्यान गुमाएका छन् भन्ने यकिन तथ्यांक नभए पनि विगत १० वर्षको अवधिमा ज्यान जानेको संख्या ५९६ रहेको छ । धादिङदेखि चितवनसम्मको सडकखण्डमा सवारी दुर्घटनाबाट ५९६ जनाको मृत्यु भएको प्रहरी प्रधान कार्यालयको तथ्यांकले जनाएको छ । त्रिशूलीमा परेर पनि अंगभंग हुनेको संख्या भने हजारौं नाघ्ने प्रहरीको भनाइ छ, राजधानी दैनिकमा खबर छ ।
