मुटु !
देख्यौ तिमीले ?
‘क’ पनि नपढेका हली बाले
‘पढ् कि पढ्’ भनेर लगाउने
लट्ठी र सिस्नुपानीमा
मुटु थियो !
भेट्यौ तिमीले ?
बाको खल्ति बाट
तिमीले चोरेको पैसाको
भरपाई गर्न
आमाले सुनारकोमा
बेचेका मुन्द्रामा
मुटु थियो !
महसूस गर्यौ तिमीले ?
विमानस्थलमा डाँको छोडी
संगिनी रूँदा
पैसा कमाएर किन्ने सपनाको कथा
कति हाँसी हाँसी सुनाएथ्यो
खाड़ी लाहुरेले छुटिने बेला !
हो,
त्यही रुखो बुको आस
र
रुन्चे हाँसोमा
मुटु थियो !
सायद कैलै लागेन तिमीलाई ,
तिम्रा रहरको अघि
कैयौं रात ऊ निदाएन
तर
कैलै भनेन ‘म निदाइन’ !
तिम्रा खुसीमा
ऊ चमक्क चम्केन कहिलै
गमक्क परेर तस्वीर मात्र खिचिरह्यो !
एल्बम पल्टाएर हेर त एकपटक,
मुस्कुराएका तिम्रा प्रत्येक तस्वीरमा
तिमीले बिर्सिएको मित्रको
मुटु छ !
मूर्ख तिमी !
महँगो कार्ड किनेका छौं
बुके गुलाब र उपहार किनेका छौ
अनि
उभिएका छौ
मुटु पाइन्छ भनेर लाइनमा !
लहै लहैमा …
अरे साथी
मुटु पाउनलाई त
मुटु देख्ने
मुटु चाहिन्छ क्या, मुटु … !
✍️हेमन्त गिरी,टोकियो
