मकवानपुर । बागमती प्रदेश सरकारले सन् २०२४ लाई भ्रमण वर्षको रूपमा मनाउने तयारी गरेको छ । प्रदेश सरकारले आगामी वर्ष २०२४ मा अधिकतम पर्यटकहरू भित्राएर बागमती प्रदेशलाई पर्यटकीय रूपमा परिचित गराउने उद्देश्य अनुरूप भ्रमण वर्ष मनाउने तयारीमा जुटेको हो ।
हवाई मार्गबाट आउने अधिकांश विदेशी पर्यटक सङ्घीय राजधानी काठमाडौँस्थित त्रिभुवन अन्तर्राष्ट्रिय विमानस्थलमा अवतरण गर्ने भएका कारण पर्यटकका लागि बागमती प्रदेश विशेष बन्ने सरकारको अपेक्षा रहेको छ । विश्व सम्पदा सूचीमा सूचीकृत नेपालका १० मध्ये ८ सम्पदा बागमती प्रदेशमा रहेकाले पर्यटकहरू आकर्षित गर्न सहजता पुग्ने आङ्कलन गरिएको छ । पर्यटकीय गन्तव्य चितवनको सौराहा, लाङटाङ तथा जुगल हिमाल, सिन्धुपाल्चोक र रामेछापको सिमानामा रहेको सैलुङ पर्यटकीय, दोलखाको जिरी र कालिन्चोक, सिन्धुपाल्चोकको पाँचपोखरी, रसुवाको गोसाईंकुण्डले पर्यटक आकर्षित गर्न सघाउ पुग्ने अपेक्षा गरिएको छ ।
