571 views 4 secs 0 comments

निर्वाचनमा खटिए ११ सय कर्मचारी

In देश, राजनीति, समाज
१९ मंसिर २०७४, मंगलवार १०:३३

मंसिर १९, २०७४-एक प्रतिनिधिसभा र दुई प्रदेशसभामा रहेको पर्वतमा ११ सय निर्वाचन कर्मचारी खटिएका छन् । ७४ मतदानस्थलका १३९ मतदान केन्द्रमा १३९ मतदान अधिकृत र त्यत्तिकै संख्याका सहायक मतदान अधिकृत खटिएका हुन् । सबै मतदान केन्द्र गरी ११ सय १२ जना कर्मचारी परिचालन गरिएको मुख्य निर्वाचन अधिकृतको कर्यालयले जनाएको छ ।

हरेक मतदान केन्द्रमा एक–एक जना मतदान अधिकृत र सहायक मतदान अधिकृत सहित ८ जना कर्मचारी खटाइएको जिल्ला निर्वाचन अधिकारी लक्षु शर्माले बताए । जिल्लाका सबै मतदान केन्द्रमा सडक सञ्जाल पुगेकाले कुनै केन्द्रमा पनि कर्मचारी पैदल जानुपरेन । हिउँदको समय भएकोले मौसमी सडकमा समेत सवारीको सहज पहुँच भएकाले सबै मतदान केन्द्रमा खटिने कर्मचारीहरू दिउँसोसम्म सदरमुकाममै थिए । निर्वाचनमा खटिएका कर्मचारीले सोमबार मतदान केन्द्रमा पुगेर मतदान क्षेत्रको चारकिल्ला तोक्ने, मौन अवधिअगावै निषेधिन वस्तुहरू रोक्न सार्वजनिक सूचना टाँस्ने लगायतका तयारी गर्नेछन् । मंगलबार र बुधबार मतदाता परिचयपत्र वितरण, मतदानस्थलको निर्माण गर्नेछन् । बिहीबारको निर्वाचनका लागि बुधबार बेलुकासम्म सबै तयारी पूरा गरिने निर्वाचन कर्मचारीहरूले बताएका छन् ।

संवेदनशीलताअनुसार सुरक्षा 

जिल्ला सुरक्षा समितिले मतदानस्थलको संवेदनशीलतालाई आधार बनाएर सुरक्षाको व्यवस्थापन गरेको छ । जिल्ला सुरक्षा समितिका सदस्य एवं पर्वत प्रहरी प्रमुख प्रहरी नायव उपरीक्षक दिलिप घिमिरेका अनुसार केन्द्रको अवस्था हेरी ८ देखि १५ जनासम्म सुरक्षाकर्मी परिचालन गरिएको छ । ‘मतदान केन्द्रको अवस्था हेरी सामान्य, संवेदनशील र अति संवेदनशील केन्द्र निर्धारण गरिएको छ,’ घिमिरेले भने, ‘मतदाता र कर्मचारीको मनोबल कमजोर हुने भएकाले कुन केन्द्र संवेदनशील भनेर सार्वजनिक गरिएको छैन ।’ विगतका निर्वाचनको अवस्था, मतदाता संख्या, केन्द्र रहेको भौगोलिक अवस्था लगायतलाई विश्लेषण गरी सुरक्षाको वर्गीकरण गरिएको घिमिरेले बताए ।

जिल्ला सुरक्षा समितिका अध्यक्ष एवं प्रमुख जिल्ला अधिकारी राजेश पन्थीका अनुसार निर्वाचन सुरक्षाका लागि नेपाल प्रहरी, म्यादी प्रहरी, शसस्त्र, नेपाली सेना र राष्ट्रिय अनुसन्धानको टोली निर्वाचन सुरक्षार्थ खटिएको छ । ‘४० युनिट सुरक्षा संयन्त्र पहिलेदेखि नै परिचालन गरेका छौं,’ पन्थीले भने, ‘जिल्लाको सबै टोलमा दैनिक एकपटक कुनै न कुनै सुरक्षाटोलीले अनुगमन गरिरहेको छ ।’ उम्मेदवार लक्षित सुरक्षा व्यवस्थामा कडाइ गरेको समितिले निर्वाचन नजिकिएसँगै जिल्लाका ७४ वटै मतदान केन्द्र र मतदाता लक्षित सुरक्षा योजना समेत बनाएको छ ।

निर्वाचनमा ५०४ नेपाल प्रहरी परिचालन, ७६६ म्यादी, २०८ शसस्त्र र १७० भन्दा बढी नेपाली सेना परिचालन हुनेछन् । पहिलो र दोस्रो घेरामा हुने नेपाल प्रहरी र सशस्त्र प्रहरीबाहेक तेस्रो घेरामा रहने सेनाले अदृश्य शक्ति संचय गरी सुरक्षा दिने योजना सुरक्षा समितिले बनाएको छ ।

कर्मचारीलाई सवारी अभाव

कुश्मा ७ को युवावर्ष प्रावि केन्द्रका मतदान अधिकृत तुलसीप्रसाद शर्माले सोमबार बिहान साढे १० बजेदेखि निर्वाचन सामग्री बोक्ने सवारी खोजे । सम्भव भए जति सबै सवारी साधन र व्यवसायी सबैतिर सम्पर्क गर्दा एउटै उत्तर आयो ‘सवारी रिजर्भमा गएको छ ।’ कतै सवारी नपाएपछि अपराह्न करिव ४ बजे नेपाल विद्युत प्राधिकरणको जिपले निर्वाचन सामग्री र कर्मचारी पुर्‍याएर फर्कियो । ‘निकै बेर भाडाका सवारी खोज्यौं । नपाएपछि विद्युत प्राधिकरणलाई आग्रह गरेका हौं ।’ सहायक मतदान अधिकृत गंगा पौडेलले भने । भाडाका सवारी साधन नपाएपछि धेरैजसो मतदान केन्द्रका कर्मचारीहरू भेग मिलाएर व्यवस्थापन गरेका थिए ।

पर्वत यातायात व्यवसायी समितिका महासचिव सुवर्ण अर्यालका अनुसार पर्वत यातायात व्यवसायी समितिमा आवद्ध ३५ बस र ७ जीपमध्ये अधिकांश सवारी साधन निर्वाचन प्रचारमा व्यस्त छन् । ‘समितिमा दर्ता नभएका धेरै सवारीले आफूखुसी चलाएका छन्,’ अर्यालले भने, ‘समितिमा दर्तामध्ये ठूला सवारी थन्किएकै छन् ।’ ग्रामीण क्षेत्रमा चल्ने साना सवारीको अभाव भएको समितिले जनाएको छ ।

नवलपरासीमा २ हजार ५४ जना 

नवलपरासी (कास)– जिल्ला निर्वाचन कार्यालय नवलपुरले निर्वाचन सामग्रीसहित कर्मचारीलाई मतदान स्थलमा पठाएको छ । नवलपुरमा १ सय १२ वटा मतदान स्थल र २ सय ५८ वटा मतदान केन्द्र छन् । तीमध्ये १२ स्थानलाई अतिसंवेदनशील, ३८ स्थानलाई संवेदनशील र बाँकीलाई साधारणका रूपमा वर्गीकरण गरिएको छ ।

जिल्लाका सबै मतदान स्थलमा पुग्ने गरी मंगलबार साँझसम्म निर्वाचन सामग्री सम्बन्धित मतदान केन्द्रमा पठाइएको भेषराज घिमिरेले बताए । नवलपुरमा रहेका २ लाख २१ हजार ७ सय १४ मतदाताले मंसिर २१ गतेहुने निर्वाचनमा मतदान गर्नेछन् ।

मतदान स्थलमा खटिएका कर्मचारीहरूले मंगलबारबाट मतदाता परिचय पत्र वितरण गर्न सुरु गर्ने घिमिरेले बताए । त्यस्तै, पश्चिम नवलपरासीमा पनि सोमबार नै मतपत्र लगायतका निर्वाचन सामग्री मतदान स्थलमा पठाइएको छ । पूर्वी नवलपरासीमा प्रतिनिधिसभातर्फ २ र प्रदेशसभातर्फ ४ वटा क्षेत्र छन् । प्रदेशसभा सदस्यको २ पदका लागि निर्वाचन क्षेत्र नंं १ मा ८ जना र निर्वाचन क्षेत्र नं. २ मा १२ जना गरी २० जना चुनावी मैदानमा छन् ।

त्यस्तै ४ प्रदेशसभा सदस्य पदका लागि १ क र १ ख मा १०/१० जना र २ क र २ ख मा ११/११ जना गरी ४२ जना चुनावी मैदानमा छन् ।

त्यसैगरी पश्चिम नवलपरासीमा १ सय २० वटा मतदान स्थल र २ सय ३७ वटा मतदान केन्द्र छन् । एउटा मतदान केन्द्रमा ५ देखि ८ जना कर्मचारी खटाइएको छ । यहाँ निर्वाचनका लागि जिल्लाभरि २ हजार ५४ जना कर्मचारी खटाइएको त्यहाँका निर्वाचन अधिकारी दीपक पौडेलले बताए ।

पश्चिम नवलपरासीमा २ लाख ८ हजार २ सय ३७ जना मतदाता छन् । यहाँ प्रतिनिधिसभा सदस्यका २ पद र प्रदेशसभा सदस्यको ४ पदका लागि गरी ८९ जना उम्मेदवारहरू चुनावी मैदानमा छन् । २ प्रदेशसभा सदस्यका लागि निर्वाचन क्षेत्र नं. १ मा १५ जना र निर्वाचन क्षेत्र नं. २ मा ११ जना गरी २६ जना चुनावी मैदानमा छन् । त्यस्तै, प्रदेश नं. ५ को प्रदेशसभा सदस्य ४ पदका लागि ६३ जना चुनावी मैदानमा छन् । पश्चिम नवलपरासीको प्रदेशसभा सदस्य निर्वाचन क्षेत्र नं. १ क मा १४ जना, १ ख मा १३ जना, २ क मा १७ जना र २ ख मा १९ जना उम्मेदवारहरू चुनावी मैदानमा छन् ।

http://kantipur.ekantipur.com/news/2017-12-05/20171205072122.html