बिरामीको पेटबाट स्टिलको गिलास निस्किएको घटनाबाट स्वयं डाक्टर मात्र होइन आफन्तजन र घटना सुन्नेहरु समेत तीनछक परेका छन् ।
घटना छिमेकी मुलुक भारतको मध्य प्रदेशस्थित सतनाको हो । त्यहाँका एक ५५ वर्षीय पुरुषको पेटबाट स्टिलको गिलास डाक्टरहरुले निकालेका छन् ।
सतनास्थित सार्थक अस्पतालमा पेट दुखेको र झाडापखाला लागेको भन्दै एकजना विरामी उपचारका लागि आए । त्यसपछि डाक्टरहरुले उनलाई पेटको एक्सरे गर्न सल्लाह दिए ।
एक्सरे रिपोर्ट हेर्दा त डाक्टरहरु झसंग भए । उनको पेटमा त स्टिलको गिलास पो छ ।
डाक्टरहरुले तत्कालै विरामीको शल्यक्रिया गरी उसको पेटबाट स्टिलको गिलास निकाल्न सफल भएका छन् । अहिले ती विरामीको अवस्था सामान्य रहेको बताइएको छ ।
उनको पेटभित्र स्टिलको गिलास कसरी पुग्यो भन्ने चाहिँ प्रष्ट हुन सकेको छैन ।
