नयाँदिल्ली– भारतको केन्द्रीय बैंक भारतीय रिजर्व बैंक (आरबीआई)का गर्भनर उर्जित पटेलले पदबाट राजीनामा दिएका छन्। आरबीआईमा डेपुटी गर्भनर र गर्भनरका रुपमा ६ वर्षसम्म काम गरेका पटेलले सोमवार घरायसी कारण देखाउँदै राजीनामा दिएका हुन्। उनको राजीनामा नरेन्द्र मोदी नेतृत्वको सरकार र आरबीआईबीच स्वायत्तताको विषयलाई लिएर टकराव चलिरहेको बेला आएको हो।
राजीनामा दिँदै पटेलले यतिका वर्ष आरबीआईमा काम गर्न पाउनु आफ्ना लागि गौरवको विषय भएको बताए। प्रधानमन्त्री मोदीले बैंकिङ्ग प्रणालीलाई अराजकताबाट बाहिर निकाल्दै अनुशासन सुनिश्चित गरेको भन्दै पटेललाई उत्कृष्ट अर्थशास्त्रीका रुपमा चित्रण गरेका छन्। पटेलकै नेतृत्वमा आरबीआईले वित्तीय स्थिरता कायम गरेको मोदीको भनाई छ।
