दार्चुलाको मतगणना गरिदै । तस्बिरः सुन्दरसिंह धामी
दार्चुला : प्रतिनिधिसभा र प्रदेशसभा निर्वाचनमा मतदाता शिक्षामा करीब ४० लाख बराबरको रकम खर्च हुँदा बदर मत अत्यधिक रहेको छ । पहिलो चरणमा मंसिर १० गते भएको प्रतिनिधिसभा र प्रदेशसभाको प्रत्यक्ष तथा समानुपातिकमा १३ दशमलव २ प्रतिशत मत बदर भएको छ । जिल्लामा प्रत्यक्षतर्फ भने ४ प्रतिशत मत बदर रहेको जिल्ला निर्वाचन कार्यालयले जनाएको छ।
मतदाता शिक्षामा साढे ३७ लाख र सञ्चार तालिम लगायत अन्य आन्तरिक खर्च जोड्दा करीब ४० लाख खर्च हुन आउने जिल्ला निर्वाचन कार्यालयका अधिकृत तुल्सीराम पाण्डेले जानकारी दिए । समानुपातिकतर्फ प्रदेशसभा ‘क’ मा कूल ३० हजार २ सय ५४ मत खसेकोमा ४ हजार १८ मत बदर भएका छन्। जुन १३ प्रतिशत हुन्छ । समानुपातिककै प्रदेशसभा ‘ख’ मा कूल २४ हजार २ सय ५० मतबाट २ हजार सात सय ७२ मत बदर भएका छन् ।
जुन ११ दशमलव ४३ प्रतिशत हुन्छ । प्रतिनिधिसभाको समानुपातिकतर्फ कुल ५४ हजार ५ सय ३ मत खसेकोमा ४९ हजार ९ सय १९ सदर भएका थिए। समानुपातिकमा बदर मत ४ हजार ५ सय ५४ रहेका छन् । संख्यात्मक हिसाबले समानुपातिकतर्फ ११ हजार ३७४ मत बदर भएको छ । प्रत्यक्षतर्फ यहाँ ४ हजार ३९३ मत बदर भएको छ थियो ।
यसरी हेर्दा प्रत्यक्षभन्दा समानुपातिकतर्फ ६ हजार ९ सय ८१ बढी मत बदर भएको छ । दुवै प्रदेशसभाको समानुपातिकतर्फ मात्रै ६ हजार ७ सय ९० मत बदर भएका छन् । कुल मतदाता संख्याको ६९ दशमलव ४२ प्रतिशत खस्दा मतदाता शिक्षा प्रभावकारी रुपमा सञ्चालन नहुँदा करीब ९ प्रतिशत मत बदर हुन पुगेको छ । प्रदेशसभा ‘क’ मा कूल खसेको मतको ८.९३ प्रतिशत मत बदरको जिल्ला निर्वाचन कार्यालयको तथ्यांकमा उल्लेख छ ।
समानुपातिककै प्रदेशसभा ‘ख’ निर्वाचन क्षेत्रमा कूल खसेको मतको ८.२४ प्रतिशत मत बदर भएको छ । त्यस्तै प्रत्यक्षतर्फ प्रदेशसभा ‘क’ क्षेत्रमा ३० हजार २ सय २० मत खसेको एक हजार ५३ मत बदर भएको छ । प्रदेशसभा ‘ख’ निर्वाचन क्षेत्रमा २४ हजार ३ सय २३ मत खसेकोमा ९ सय ९३ मत बदर भएको जिल्ला निर्वाचन कार्यालयले जनाएको छ ।
बदर मतको संख्या बढ्नुमा मतदाता शिक्षा प्रभावकारी नहुनु र मतदान स्थलमा सही तरिकाले मतदाताहरूलाई मतदान प्रकृया बारे जानकारी गराउन नसकेको मतदाताको गुनासो छ । मतदाता शिक्षा कार्यक्रमका लागि पर्याप्त सयमको अभाव, मतदाताहरूमा सिक्ने इच्छा शक्तिको अभावका कारण मत बदर संख्या न्यून गर्ने लक्ष्य सफल हुन नसकेको जिल्ला निर्वाचन अधिकारी तुल्सीराम पाण्डेले बताए । एक प्रकारको मत अर्को प्रकारको मतपेटिकामासमेत मत भेटिएको हुनाले बदर मतको संख्या बढी देखिएको हो ।