काठमाडौं : बिहीबार ४५ जिल्लामा सम्पन्न चुनावमा ६७ प्रतिशत मत खसेको छ। निर्वाचन आयोगका अनुसार यो आँकडा प्रारम्भिक हो। यो प्रतिशत बढ्न सक्ने आयोगको भनाइ छ। यो पहिलो चरण अर्थात् मंसिर १० गते सम्पन्न निर्वाचनभन्दा केही प्रतिशत बढी हो। आयोगका अनुसार सबैभन्दा बढी गुल्मीमा ७१ प्रतिशत मतदान भएको छ।
संघ र प्रदेशको दोस्रो चरण चुनावअन्तर्गत राजधानीसहित पहाड र तराईका ४५ जिल्लामा मतदान भएको हो। प्रतिनिधिसभा सदस्यतर्फ १२८ र प्रदेशसभातर्फ २५६ गरी जम्मा ३८४ निर्वाचन क्षेत्रमा मतदान सम्पन्न भएको छ। ती निर्वाचन क्षेत्रका लागि १५ हजार ३४४ मतदान केन्द्रमार्फत बिहान ७ बजेदेखि साँझ पाँच बजेसम्म भोट हाल्ने व्यवस्था मिलाइए पनि मतदान केन्द्र प्रवेश गरेका मतदाताले साँझसम्म मतदान कार्यमा सहभागी थिए।
मंसिर १० गते ३२ जिल्लाका प्रतिनिधिसभा सदस्यका लागि ३७ निर्वाचन क्षेत्र र प्रदेशसभा सदस्यका लागि ७४ क्षेत्रमा भएको मतदानमा ६५ प्रतिशत मत खसेको थियो। निर्वाचनबाट संविधान कार्यान्वयन गर्न र संक्रमणकाल अन्त्यका लागि महत्वपूर्ण योगदान पुगेको विश्वास आयोगले लिएको प्रमुख निर्वाचन आयुक्त यादवले बिहीबार साँझ आयोगमै आयोजित पत्रकार सम्मेलनमा बताए। ‘निर्वाचनमार्फत अब मुलुक संघीयता कार्यान्वयन तहमा पुगेको छ।’ सातवटै प्रदेश र ७७ वटै जिल्लामा सफलतापूर्वक निर्वाचन सम्पन्न गर्न सुरक्षाकर्मी कर्मचारी तथा सबै मतदाताप्रति आयोग आभार प्रकट गर्दछ’, उनले भने। आयोगका सचिव बेगेन्द्रराज शर्माले तीन चरणको निर्वाचन सम्पन्न गरेर आयोगले संवैधानिक दायित्व पूरा गरेको बताए।
मतदानका लागि बिहान ७ बजेअगाडि नै मतदाता लामबद्ध भएर बसेका थिए। चिसोको कारण धेरैजसो वृद्धवृद्धा भने दिउँसो मात्रै मतदानस्थल पुगेका थिए। आयोगले मतदानस्थल व्यवस्थित बनाएको थियो। महिला-पुरुषका लागि छुट्टाछुट्टै लाम व्यवस्था गरिएको थियो। समानुपातिकतर्फ दुई छाप लगाउनुपर्ने भएकाले मतदाता केही अलमलमा परेको देखिन्थ्यो। मतदान केन्द्रमा प्रवेश गरेपछि मत खसालेर निस्कन एक जनालाई १० मिनेटसम्म लागेको थियो।
अपांगता भएका, गर्भवती, सुत्केरी, ज्येष्ठ नागरिक, अशक्त वा बिरामी मतदातालाई प्राथमिकता दिई मतदान गर्ने व्यवस्था मिलाइएको थियो। दृष्टिविहीन वा शारीरिक अशक्तता भएका मतदातालाई पनि मताधिकार प्रयोग गर्र्ने व्यवस्था गरिएको थियो। मतदान स्थलमा तीन तहको सुरक्षा घेराले सुरक्षा दिएको थियो। राजधानीलगायत विभिन्न जिल्लामा केही झडप तथा विस्फोटनका घटना भए पनि निर्वाचन शान्तिपूर्ण रूपमै सम्पन्न भएको छ।
बिहीबारको मतदानमा १५२ जना तेस्रोलिंगीसहित १ करोड २२ लाख ३५ हजार ९९३ जना मतदाता मताधिकार प्रयोग गर्ने विश्वास आयोगले लिएको थियो। तर, युवाको सहभागिता कम भएकाले यसपटक मतदान कम भएको अनुमान गरिएको छ। मुख्य निर्वाचन आयुक्त डा. अयोधीप्रसाद यादवले निर्वाचनमा पनि उत्साहजनक रूपमा मतदाताले सहभागिता जनाएको बताए। निर्वाचनका लागि सरकारले गरेको सुरक्षा प्रबन्ध प्रभावकारी भएका कारण पनि निर्वाचन शान्तिपूर्ण रूपमा सम्पन्न भएको प्रमुख आयुक्त यादवले पत्रकार सम्मेलनमा जानकारी दिए।
अर्घाखाँची जिल्लाको सन्धिखर्क नगरपालिका वडा नम्बर ५ मथुरा निम्न माध्यमिक विद्यालय नेटा मतदान स्थलका (क) र (ख) गरी दुईवटा केन्द्रको मतदान स्थगन भएको। मतदान केन्द्र (ख) का मतदान अधिकृतले मतपत्रमा सही नगरेको भनी कांग्रेस कार्यकर्ताले एउटा मतपेटिका तोडफोड गरी फालेको र बाँकी मतपत्र च्यातेकाले उक्त केन्द्रको मतदान कार्य स्थगन भएको हो। सो मतदान केन्द्रमा केही दिनभित्रै पुनः मतदान गर्ने व्यवस्था मिलाएको आयोगको भनाइ छ।
बिहीबार मतदान सकिएलगत्तै सबैै मतपेटिका सुरक्षित साथ जिल्ला सदरमुकामस्थित मुख्य निर्वाचन अधिकृत र निर्वाचन अधिकृतको कार्यालयमा संकलन गर्ने काम सुरु भइसकेको आयोगले जनाएको छ। संकलित मतपेटिका मुख्य निर्वाचन अधिकृत, निर्वाचन अधिकृत, सुरक्षा निकाय र राजनीतिक दल तथा उम्मेदवारको सहमतिमा सुरक्षित स्थानमा राख्ने प्रबन्ध मिलाइएको प्रमुख आयुक्त यादवले बताए।
