जाजरकोट : ३० घण्टा पैदल हिँडेर मतपेटिका सदरमुकाम ल्याइएको छ। आइतबार बेलुका ५ बजे मतदान सकिएलगत्तै मतदानस्थलबाट मतपेटिका बोकेर सदरमुकाम हिँडेका कर्मचारी ३० घण्टा लगाएर मंगलबार बेलुका सदरमुकाम आइपुगे।
तीन दिन लगाएर मतपेटिका ल्याएका मतदान अधिकृत, सहायक मतदान अधिकृत, सहयोगी कर्मचारी र सुरक्षाकर्मी थाकेर लखतरान देखिन्थे। बारेकोट गाउँपालिका ९ सिलिङ्चौर ख मतदान केन्द्रका मतदान अधिकृत ऋषभदेव खनाल आफूलाई धेरै पटक चुनाव गराएको अनुभव भएपनि यस पटकजस्तो सास्ती कहिल्यै नपाएको बताउँछन्।
मतपेटिकाको सुरक्षालाई ध्यानमा राखेर सुरक्षाकर्मीले पैदलै हिँड्न निर्देशन गरेपछि बारेकोट गाँउपालिका, त्रिवेणीनलगाड नगरपालिका, जुनीचाँदे गाँउपालिका र कुशे गाँउपालिकामा मतदानका लागि खटिएका कर्मचारीले सास्ती पाएका हुन्।
हेलिकप्टरको पर्खाईमा बारेकोट र त्रिवेणीनलगाडका मतपेटिका केही बेर दल्लीमा कुरे पनि नआएपछि उनीहरू पैदलै हिँड्न बाध्य भए। कच्ची बाटोमा विप्लव नेतृत्वको नेकपाका कार्यकर्ताले विद्युतीय धराप थाप्न सक्ने शंकाले सुरक्षाकर्मीले पैदलै मतपेटिका ढुवानी गरेको हो।
जिल्लाका एक सय १६ स्थानका मतपेटिका कडा सुरक्षाका साथ सदरमुकामस्थित मुख्य निर्वाचनको अधिकृतको कार्यालयमा राखिएको छ। मतपेटिकालाई काँडेतारका सुरक्षा घेरामा नेपाल प्रहरी, सशस्त्र प्रहरी र नेपाली सेनाले सुरक्षा प्रदान गर्ने भएको छ। मुख्य निर्वाचन अधिकृतको कार्यालयले प्रत्यक्षतर्फको मतपेटिका कार्यालयकै एक कोठामा राखेको छ भने समानुपातिकतर्फको मतपेटिका कार्यालय परिसर नजिकै वृद्धाश्रम केन्द्रको हलमा राखेको छ।
