मंसिर १२, २०७४-मतपेटिका ओसार्न गाउँ पुगेको हेलिकप्टर विवादपछि त्यसै फर्किएको छ । मतपेटिका बोकेको हेलिकप्टर कोरको चढ्ने भन्ने राजनीतिक दलका प्रतिनिधिबीचको विवाद चर्कंदा त्यसै फर्कनुपरेको हो ।
जिल्लाको दुर्गम गाउँपालिका काँडा पुगेको हेलिकप्टर चढ्न राजनीतिक दलका एजेन्ट ९प्रतिनिधि० हरूबीच हानथाप चलेको थियो । ६ जना मात्र चढ्न मिल्ने हेलिकप्टरमा सबै दलका एजेन्ट नअटाउँदा विवाद बढेको हो । काँडामा ५ मतदान केन्द्र छन् । नेपाली सेनाको हेलिकप्टरले पहिलो खेपमा धुली निमावि मतदानस्थलका दुई मतदान केन्द्रबाट ६ वटा मतपेटिका र दुई मतदान अधिकृतलाई सदरमुकाम ओसारेको थियो । दोस्रो खेपमा धलौन मावि मतदानस्थलका दुई मतदान केन्द्रबाट ६ वटा मतपेटिका र दुई जना मतदान अधिकृत लिएर हेलिकप्टर काँडा मावि पुगेको थियो ।
‘दुई जनाको सिटमा धलौनको मतपेटिका राखिएको थियो । खाली रहेका ४ सिटमध्ये ३ सिटमा धलौनकै मतदान अधिकृत र पत्रकार थियौं,’ मतपेटिका संकलनको खबर छायांकन गर्न काँडा पुगेका सुवास कठायतले विवादका कारणबारे भने, ‘हेलिकप्टरमा एक जना मान्छे र ३ वटा मतपेटिकाका लागि मात्र ठाउँ थियो । तर दलका एजेन्टहरूले कि त हामीलाई पनि हेलिकप्टरमा लैजानुपर्छ, होइन भने मतपेटिकासहित सबै हिँडेर जानुपर्छ भनेर जिद्दी गर्न थाले ।’
को चढ्ने भन्ने विषयमा विवाद भएपछि काँडा माविको प्रांगणमा आधा घण्टाभन्दा बढी हेलिकप्टर त्यत्तिकै राख्नुपरेको थियो । वाम गठबन्धनका मतदान प्रतिनिधिले आफू हेलिकप्टरमा जान पाउनैपर्ने अडान लिएपछि लोकतान्त्रिक गठबन्धनका प्रतिनिधि पनि अडानमा कायमै रहेका थिए । धलौनका मतदान अधिकृत र हेलिकप्टरका चालकले सिट खाली नभएका कारण एक जना मतदान अधिकृत र मतपेटिका मात्र लैजान सकिने भन्दै लामो समय उनीहरूलाई सम्झाउने प्रयास गरेका थिए ।
‘मान्दै मानेनन्,’ कठायतले भने, ‘अन्य जिल्लाको मतपेटिका पनि ओसार्नुपर्ने भएकाले हेलिकप्टर मतपेटिका छाडेर फर्कियो ।’ विवादका कारण हेलिकप्टरबाट ओसार्न नसकिएपछि काँडा माविको मतपेटिका स्थलमार्गबाटै ल्याउने तयारी गरिएको मुख्य निर्वाचन अधिकृत पूर्णप्रसाद बास्तोलाले बताए । ‘काँडाबाट हिँडेको दुई दिनमा सदरमुकाम आइपुग्छ । कहिले हिँड्ने भन्नेबारे छलफल गर्दै छौं,’ उनले भने, ‘रातदिन गरेर भए पनि छिटो मतपेटिका पुर्याउने कोसिसमा छौं ।’ विवाद भएको मतदानस्थल सदरमुकामबाट ९० किमि दूरीमा छ । अन्य ठाउँको आइपुग्यो १ सय ६० मतदान केन्द्र रहेको यस जिल्लामा काँडाको एउटा मतदान केन्द्रबाहेक सबै ठाउँको मतपेटिका सदरमुकाम आइपुगेको छ । जिल्लाभरबाट संकलन गरिएका ४ सय ७७ मतपेटिका जिल्ला पशुसेवा कार्यालयको नयाँ भवनमा विशेष सुरक्षासहित राखिएको छ ।
माथिल्लो तलाका ३ अलगअलग कोठामा प्रतिनिधिसभा, प्रदेशसभा र समानुपातिकका मतपेटिका राखिएका छन् । मतपेटिकालाई नेपाल प्रहरी, सेना, सशस्त्र प्रहरी र म्यादी प्रहरीले चौबिसै घण्टा सुरक्षा दिने गरी व्यवस्था मिलाइएको प्रहरीले जनाएको छ । लोकतान्त्रिक र वाम गठबन्धनका उम्मेदवारले पनि आलोपालो आफ्ना प्रतिनिधि मतपेटिका राखिएको स्थलमा कुर्ने व्यवस्था मिलाउन लागेको बुझिएको छ ।
बैतडीका मतपेटिका सदरमुकाम पुगेआइतबार रातिदेखि संकलन थालिएको बैतडीका सबै मतपेटिका सोमबार साँझसम्म सदरमुकाम ल्याइपुर्याइएको छ । ९ स्थानीय तहका मतपेटिका सोमबार बिहान भण्डारण सकिए पनि यातायात असुविधाका कारण सिगास गाउँपालिकाका १४ मतदानस्थलका मतपेटिका ल्याउन केही ढिलो भएको मुख्य निर्वाचन अधिकृतको कार्यालयले जनाएको छ ।
जिल्लाका १ सय ८२ मतदान केन्द्रमा ५ सय ४६ मतपेटिका प्रयोग भएका छन् । जिल्ला सदरमुकाम ल्याइएका मतपेटिका दशरथचन्द नगरपालिका भवनमा राखिएको छ । ६ वटा कोठामा मतपेटिका भण्डारण गरी तीनघेरे सुरक्षा मिलाउने तयारी भएको छ । प्रहरी, सशस्त्र प्रहरी र सेनाको तीन घेरा राखिने प्रमुख जिल्ला अधिकारी सिद्धराज जोशीले बताए ।
सोमबार सर्वदलीय बैठक बोलाइएको छ । राजनीतिक दलका प्रतिनिधिलाई पनि सुरक्षा घेरामा सामेल गराउनेबारे छलफल गरिने उनले जनाए । दार्चुलाका १२३ मतदान केन्द्रबाट ल्याइयो दार्चुलाको हिमाली क्षेत्रका मतदान केन्द्रबाट मतपेटिका मतगणनास्थल ल्याउने क्रम जारी छ । सोमबार साँझ ५ बजेसम्म १ सय २३ मतदान केन्द्रका मतपेटिका जिल्ला सदरमुकाम खलंगास्थित कर्मचारी आवास भवनमा ल्याइसकिएको मुख्य निर्वाचन अधिकृतको कार्यालयले जनाएको छ । अपी हिमाल गाउँपालिकाका ५ मतदान केन्द्रमध्ये क्षति र पाथाका मतपेटिका हेलिकप्टरबाट ल्याइएको छ । बाँकी पनि सोमबारै मतगणनास्थल आइपुग्ने मुख्य निर्वाचन अधिकृत राजेन्द्र नेपालले बताए ।
ब्यास गाउँपालिकाअन्तर्गत दुम्लिङ मतदान केन्द्रको मतपेटिका भने मंगलबार हेलिकप्टरबाट ल्याइने उनले जनाए । मतपेटिकासँगै ग्रामीण भेगबाट दलका कार्यकर्तासमेत मतगणनास्थल आउन थालेका छन् । जिल्लामा शान्तिपूर्ण रूपमा मतदान भएको र सुरक्षितसाथ मतपेटिका मतगणनास्थल ल्याइएको जिल्ला सुरक्षा समितिले जनाएको छ । नेता कार्यकर्ता ओइरिन थालेपछि सदरमुकामको माहोल अझ बढेको देखिन्छ ।
मतपेटिका सशस्त्र प्रहरी र नेपाल प्रहरीको सुरक्षा घेरामा सदरमुकामस्थित निजामती कर्मचारी आवासगृहमा राखिएको छ । उक्त क्षेत्र सुरक्षित रहेकाले मतगणना कर्मचारी आवास गृहमै हुने प्रमुख जिल्ला अधिकारी जनार्दन गौतमले बताए । स्थानीय तह निर्वाचनको महाकाली नगरपालिकाको मतगणना पनि यहीं भएको थियो ।
