बुटवल : व्यवसायी वसन्त पौडेल हत्याको विरोधमा आन्दोलनरत युवा संघ रूपन्देहीले बन्दको कार्यक्रम फिर्ता लिएको छ। स्थानीय प्रशासनसँग अपराधीलाई पक्राउ गर्ने, पौडेल र गतवर्ष हत्या भएका दुर्गा तिवारीलाई सहिद घोषणा गर्न सिफारिस गर्ने, देवदह क्षेत्रमा सुरक्षा संरचना थप र राहत दिने सहमति भएपछि अनिश्चितकालीन बन्द फिर्ता भएको हो।
जिल्ला युवा संघका अध्यक्ष नकुल शाहीले सहमति कार्यान्वयनमा तदारुकता नदेखाए पुनः आन्दोलन गर्न बाध्य हुने चेतावनी दिएका छन्। ‘गत वर्ष दुर्गा तिवारीलाई पनि सहिद घोषणा गर्ने सहमति भएको थियो, तर कार्यान्वयन भएन, उनले भने, ‘यसपटक पनि सहमति कार्यान्वयन भएन भने कडा आन्दोलन गर्न बाध्य हुनेछौं।’
आइतबार साँझदेखि बन्द फिर्ता भएपछि जिल्लाको जनजीवन सामान्य भएको छ। नवलपरासीको सुनवल र कपिलवस्तु ४ मा रोकिएका यातायात साधन बन्द खुलेपछि गन्तव्यतिर लागेका छन्। शुक्रबार बिहान पौने ११ बजे फर्निचर व्यवसायी तथा युवा संघ क्षेत्रीय सदस्य पौडेलको देवदहको ढेकावारमा हत्या भएपछि रूपन्देही तीन दिनसम्म ठप्प बनेको हो।
प्रहरीले हत्यामा संलग्नलाई प्रक्राउ गर्ने र साको अनुसन्धान जारी रहेको भन्दै यथाशक्य छिटो नतिजामा पुग्ने बताएपछि आन्दोलनका कार्यक्रम फिर्ता गरिएको युवा संघले जनाएको छ। आन्दोलन फिर्तासँगै लुम्बिनी अञ्चल अस्पतालमा रहेको पौडेलको शव पोस्टमार्टमपछि दाहसंस्कार गरिने बताइएको छ।
अनुसन्धानलाई तीव्रता दिँदै प्रहरी
प्रहरीले हत्याको जिम्मा लिएका मनोज पुनको संलग्नताबारे अनुसन्धान भइरहेको जनाएको छ। दुर्गा तिवारीको हत्याका मुख्य योजनाकार पुन नभई समीरमान बस्न्यात भएको केन्द्रीय अनुसन्धान ब्युरोले जनाएको छ। पुनले असुलीका लागि मात्रै घटनाको जिम्मा लिने गरेको दाबी गरेकाले सीआईबीले घटना अनुसन्धानमा एसपी घनश्याम आर्यालको टिम खटाएको छ। निर्माण व्यवसायी संघका अध्यक्ष शरदमान गौचनको हत्या अनुसन्धानका क्रममा सीआईबीले पुनलाई सहयोगी मात्रै भएको दाबी गरेको छ। समीरमान बस्न्यात अहिले प्रहरी हिरासतमा छन्।
तिवारी हत्याका सुटर भनिएका लोप्साङ लामा भने फरार रहेका छन्। तर सीआईबीले गत मंसिर १७ गते सार्वजनिक गरेको अनुसन्धान प्रतिवेदनप्रति देवदहबासी विश्वस्त छैनन्। प्रहरीले मनोज पुनलाई पक्राउ गर्न नसकेपछि समीरमान बस्न्यातलाई मुख्य योजनाकार देखाएर उम्किन खोजेको आरोप परिवार स्रोतको छ। बस्न्यातले तिवारीको हत्या गरेको भए उही प्रकृतिको पौडेलको हत्यामा पक्राउ परेका उनले कसरी गरे भन्ने प्रश्न उब्जिएको छ।
आफू मलेसिया रहेको बताउने पुनले पुरानो रिसइवीका कारण पौडेल र तिवारीको हत्या गरेको बताइरहेका छन्। ‘हामीले सबै पाटाहरूमा रहेर अनुसन्धान गरिरहेका छौं, रूपन्देहीका प्रहरी प्रमुख श्यामलाल ज्ञवालीले भने। घटनाको अनुसन्धानका लागि केन्द्र र स्थानीय प्रहरी टोली परिचालित छ। हत्या लगत्तै फेला परेको मोटरसाइकल भारतको विहारमा दर्ता भएको ज्ञवालीले बताए। देवदहका युवालाई पटक-पटक धम्की दिँदै हत्या भएकाले पुनले नै घटना घटाएको परिवार स्रोतको दाबी छ। उनीहरूले विदेशमा रहेको बताउने पुनलाई कुनै हालतमा पक्राउ गर्नुपर्ने माग गरिरहेका छन्।
