एजेन्सी। १७ वर्षकी किशोरीलाई बलात्कारको अभियोगमा पक्राउ परेका अभियुक्तलाई अदालतले रिहा गर्ने फैसला गरेपछि आयरल्याण्डमा ‘यौनको लागि सहमति’को मुद्दामा ठाउँठाउँमा विरोध प्रदर्शन गरिएको छ । मुद्दाको सुनुवाइको दौरान अभियुक्तको पक्षका वकिलले अदालतमा भनेकी थिइन् ‘तपाइँले उनको पोशाकलाई पनि हेर्नुपर्छ। उनले थोंग (अन्डरवेयर) लगाएकी थिइन् जसको अगाडि फिता थियो।’
अदालतले २८ वर्षीय अभियुक्तलाई दोषी पाएन। अदालतको फैसलामाथि विवाद भएपछि बलात्कार पीडितमाथि आरोप लगाइएको मुद्दा उठाउन आयरल्याण्डकी एक महिला सांसद अण्डरवेयर लिएर संसदमा आएकी थिइन्। सांसद रुथ क्यापिंगरले संसदमा निलो रंगको फिता भएको अण्डरवेयर देखाउँदै भनिन्–यहाँ अण्डरवेयर देखाउनु लाजको विषय हुन सक्छ। तर तपाइँले के सोच्नुपर्छ भने एक महिलाको अण्डरवेयरलाई अदालतमा देखायो भने उसलाई कस्तो लाग्छ?’
यो विषयमा सबैभन्दा पहिला ६ नोभेम्बरमा आइरिश एक्जामिनर पत्रिकाले समाचार प्रकाशित गरेको थियो। अभियुक्तले आफूले किशोरीसँगको सहमतिमै यौन सम्बन्ध राखेको बताएका थिए। तर उनकी वकिल एलिजाबेथ ओकोनेलले अदालतमा दिएका तर्कका विषयमा सामाजिक संजालमा निकै विवाद भएको छ । उनले अदालतमा बलात्कृत किशोरीलाई लक्षित गर्दै भनेकी थिइन् ‘के प्रमाणहरु यो सम्भावना देखाउँदैनन् कि उनी अभियुक्ततर्फ आकर्षित थियन् र उनीसँग भेट्न, साथ रहनको लागि सहमत थिइन् ? तपाइँले उनको पोशाकलाई पनि हेर्नुपर्छ। उनले थोंग (अन्डरवेयर) लगाएकी थिइन् जसको अगाडि फिता थियो।’
यस विषयमा पत्रिकामा समाचार प्रकाशित भएको भोलिपल्टै डबलिन रेप क्राइसिस सेन्टरकी प्रमुखले ती वकिलको भनाइको आलोचना गरेकी थिइन् । यद्यपि उननले फैसलाको भने आलोचना गरिनन् । तर, कानुनी प्रक्रियामा सुधारको माग गर्दै भनिन् यसप्रकारको टिप्पणी अक्सर गरिन्छ । आयरल्याण्डका नागरिकले यस विषयलाई लिएर सामाजिक संजालमा कडा टिप्पणी गरेका छन् । ह्याशट्याग दिसइजनटकन्सेन्ट को साथमा धेरै जनाले ट्वीट गरेका छन् । कैयौं महिलाहरुले आफ्नो भित्री वस्त्र पनि पोस्ट गरेका छन् ।
अदालतमा यस किसिमको तर्क दिइनुको विरोध गर्दै महिलाहरुले आफ्नो अण्डरवेयरको रंग र आकार देखाएका छन् । धेरै महिलाहरुले ययस्ता देशहरुको बारेमा पनि बताएका छन् जहाँ बलात्कारको विषयमा के भन्न पाइने र के भन्न नपाइने भन्ने विषयमा कडा नियम छ । संसदमा अण्डरवेयर देखाएपछि सांसद कोपिंगरले भनिन् कि न्यायाधीश र ज्यूरी सदस्यलाई यसबारे प्रशिक्षित गर्नुपर्छ ।
यसै वर्ष उत्तरी आयरल्याण्डमा बलात्कारको एक मुद्दामा रग्बीका २ खेलाडीलाई पनि रिहा गरिएको थियो । अदालतको सुनुवाइको व्यहोरा सार्वजनिक भएपछि आयरल्याण्ड र उत्तरी आयरल्याण्डमा व्यापक प्रदर्शन भएका थिए । आज पनि राजधानी डबलिनसहित कैयौं ठाउँमा प्रदर्शन हुँदैछन् । समाजवादी महिलावादी समूह रोजाले सामाजिक संजालमा पनि अभियान चलाएको छ । डबलिनका अलावा कोर्क, लिमेरिक र वाटरफर्ड शहरमा पनि आज प्रदर्शन हुँदैछन् ।
