मतपेटिका हेर्न दलहरूले राखे आफ्नै सिसिटिभी

आइतबार ३२ जिल्लाका ३७ निर्वाचन क्षेत्रमा पहिलो चरणको चुनाव भएको छ। प्रदेश र प्रतिनिधि सभा सदस्य छान्न भएको निर्वाचनमा ६५ प्रतिशत मतदान भएको निर्वाचन आयोगले जनाएको छ।

धेरै जिल्ला हिमाली र पहाडी क्षेत्रमा पर्ने भएकाले सबै ठाउँमा मतपेटिका संकलन अझै सकिएको छैन। केही विकट जिल्लामा मंगलबार साँझमात्र मतपेटिका संकलन हुने जनाइएको छ।

मतपेटिका संकलन भएका ठाउँमा पनि मतगणना भएको छैन। मंसिर २१ गते दोस्रो चरणको निर्वाचनपछि मात्र देशभरि मतगणना सुरु गर्ने आयोगको निर्णय छ।

त्यतिञ्जेल ३२ जिल्लाको मतपत्र सुरक्षित राखिने आयोगले जनाएको छ।

कुन जिल्लामा कसरी मतपेटिका राखिएको छ भनेर हामीले ३२ जिल्ला निर्वाचन कार्यालयमा सोधेका थियौं।

ताप्लेजुङका जिल्ला निर्वाचन अधिकारी महेशकुमार ठाकुरका अनुसार ११४ मतदान केन्द्रमध्ये धेरै ठाउँको मतपेटिका सदरमुकाम ल्याइसकिएको छ। बाँकी मतपेटिका सोमबार साँझसम्म ल्याइनेछ।

मतपेटिकालाई जिल्ला अदालतको भवनमा राख्ने व्यवस्था मिलाइएको छ।

पाँचथरका १६५ वटै मतदान केन्द्रका मतपेटिका संकलन भइसकेका छन्।

जिल्ला निर्वाचन अधिकारी ध्रुव राईका अनुसार सर्वदलीय बैठकपछि जिल्ला कर्मचारी मिलन केन्द्रको भवनमा मतपेटिका राखिएको छ। ‘भवनमा चारैतिर तारजाली लगाइएको छ। सिसिटिभी पनि मतपेटिका राखिएकोतिर फर्काइएको छ,’ राईले भने, ‘यहाँ त दलहरुले पनि आ–आफ्ना सिसिटिभी राखेका छन्, जिल्ला समन्वय समिति एक कोठामा सिसिटिभी हेर्ने व्यवस्था मिलाइएको छ।’

संखुवासभाका १५३ मध्ये ९ केन्द्रको मतपेटिका ल्याउन बाँकी छ।

हेलिकोप्टरबाट मतपेटिका ल्याउनु पर्ने भएकाले ढिला भएको जिल्ला निर्वाचन अधिकारी ऋषि दाहालले जानकारी दिए। संकलन गरिएका मतपेटिका जिल्ला समन्वय समितिको भवनमा राखिएको छ।

भोजपुरमा पनि मतपेटिका संकलन कार्य जारी छ। जिल्ला अदालतको भवनमा मतपेटिका राखिएको छ। सबै मतपेटिका संकलन भइसकेपछि सर्वदलीय बैठक बसेर मतपेटिकाको निगरानी कसरी गर्ने टुंगो लगाइने जिल्ला निर्वाचन अधिकारी राजेन्द्रप्रसाद पोखरेलले जानकारी दिए।

सोलुखुम्बुमा पनि सोमबार साँझसम्म मतपेटिका सदरमुकाम ल्याउने गरी काम भइरहेको छ। त्यहाँ जिल्ला समन्वय समितिको हलमा मतपेटिका राखिनेछ।

खोटाङका १७९ मतदान केन्द्रका मतपेटिका मंगलबारसम्म सदरमुकाम दिक्तेल ल्याइने छ। जिल्ला निर्वाचन कार्यालयका खरिदार बविन अधिकारीका अनुसार जिल्ला अदालतको भवनमा मतपेटिका राखिएको छ।

ओखलढुंगाका सहायक मुख्य निर्वाचन अधिकृत तीर्थ भट्टराईका अनुसार सोमबार राति १० बजेसम्म सबै १४१ केन्द्रबाट मतपेटिका ल्याउने गरी काम भइरहेको छ। सदरमुकाम ल्याइएका मतपेटिका जिल्ला समन्वय समितिको हलमा राखिएको छ। मतपेटिका राखिएको ठाउँमा सिसिटिभी राखिएको छ।

दोलखामा १९० केन्द्रका मतपेटिका संकलन भइसकेको छ। जिल्ला अदालतमा मतपेटिका राखिएको छ।

रामेछापका मुख्य निर्वाचन अधिकृत कृष्णप्रसाद पौडेलका अनुसार जिल्लाका १९१ केन्द्रको मतपेटिका संकलन भइसकेको छ। संकलित मतपेटिकालाई मन्थलीस्थित मालपोत कार्यालयको भवनमा राखएको छ। मतपेटिका राखिएको भवनलाई नेपाल प्रहरी र सशस्त्र प्रहरी बलले पहरा दिइरहेका छन्।

दुई वटा निर्वाचन क्षेत्र रहेको सिन्धुपाल्चोकमा पनि मतपेटिका संकलन सकिएको छ। दुबै क्षेत्रका मतपेटिका चौतारास्थित कृषि विकास कार्यालयको भवनमा राखिएको छ।

नुवाकोटको क्षेत्र नम्बर १ का मतपेटिका विदुरस्थित सहकारी डिभिजन भवनमा राखिएको छ भने दुई नम्बर क्षेत्रका मतपेटिका कोष तथा लेखा नियन्त्रण कार्यालयको भवनमा राखिएको छ।

४५ मतदान केन्द्र भएको रसुवामा पनि मतपेटिका संकलन सकिएको छ। धुन्चेस्थित जिल्ला प्राविधिक कार्यालयमा मतपेटिका राखिएको छ। जिल्ला निर्वाचन अधिकारी नवीन खालिङका अनुसार भवनलाई सशस्त्र र नेपाल प्रहरीले पहरा दिइरहेका छन् भने राजनीतिक दलका ४÷४ जना प्रतिनिधिले पनि मतपेटिका निगरानी गरिरहेका छन्।

‘सिसिटिभी राख्ने हामीसँग बजेट छैन,’ खालिङले भने, ‘केन्द्रले बजेट दियो भने सिसिटिभी राख्ने योजनामा छौं।’

गोरखाका उत्तरी भेगबाट हेलिकप्टरमार्फत मतपेटिका संकलन भइरहेको छ। गोरखा–१ का मतेटिका महिला तथा बालबालिका कार्यालयमा राखिएको छ भने गोरखा दुई नम्बर क्षेत्रको मतपेटिका जिल्ला समन्वय समितिको भवनमा राखिएको छ।

लमजुङका जिल्ला निर्वाचन अधिकारी तुलसीप्रसाद तिमिल्सेनाका अनुसार सबै मतपेटिका जिल्ला समन्वय समितिको भवनमा राखिएको छ।

‘हामीले प्रत्यक्ष र समानुपातिकको मतपेटिका फरक–फरक ठाउँमा राखेका छौं,’ तिमिल्सेनाले भने, ‘सबै कोठामा सिसिटिभी राखिएको छ।’

मनाङमा मतपेटिका संकलन जारी छ। चामेस्थित जिल्ला अदालत भवनमा मतपेटिका राखिएको जिल्ला निर्वाचन कार्यालयका सुब्बा सूर्यप्रसाद तिवारीले जानकारी दिए।

मुस्ताङमा पनि मतपेटिका संकलन जारी छ। सदरमुकाम जोमसोमस्थित जिल्ला समन्वय समितिको हलमा मतपेटिका राखिएको छ।

दुई क्षेत्र रहेको बाग्लुङमा पनि मतपेटिका संकलन भएइरहेको छ। दुबै क्षेत्रका मतपेटिका जिल्ला समन्वय समितिको भवनका ४/४ कोठामा राखिएको छ।

म्याग्दीका जिल्ला निर्वाचन अधिकारी केदार पौडेलका अनुसार जिल्लाका सबै मतपेटिका संकलन भइसकेको छ। संकलित मतपेटिका बेनीस्थित जिल्ला अदालत भवनका तीन कोठामा राखिएको छ।

‘हामीले दलका प्रतिनिधिलाई पनि चाहेको बेला आएर बस्न मिल्ने गरी भवनभित्रै ठाउँ छुट्याएका छौं,’ पौडेलले भने, ‘मतगणना हुँदासम्म सिसिटिभी पनि जोड्ने कुरा छ।’

रोल्पाका १६० मध्ये २१ केन्द्रको मतपेटिका संकलन बाँकी छ। संकलन भएका मतपेटिका लिबाङस्थित घरेलु तथा साना उद्योग कार्यालयमा राखिएको छ।

पश्चिम रुकुमका मतपेटिका खलंगास्थित जिल्ला समन्वय समितिको भवनमा राखिएको छ।

पूर्वी रुकुमका मतपेटिका राख्न भने विद्यालय भवनको प्रयोग गरिएको छ। रुकुमकोटमा उपयुक्त सरकारी कार्यालय नभएपछि रुक्मिणी माध्यामिक विद्यालयको कक्षाकोठामा मतपेटिका राखिएको हो।

जाजरकोटमा सोमबार बिहानदेखि मात्र मतपेटिका संकलन सुरु गरिएको छ। जिल्ला निर्वाचन कार्यालयका अनुसार मंगलबार साँझसम्म सबै मतपेटिका सदरमुकाम खलंगामा ल्याइनेछ। मतपेटिका जिल्ला अदालतको भवनमा राखिएको छ। त्यहाँ मतपेटिकाको निगरानीमा कांग्रेस र वाम गठबन्धनका कार्यकर्ता पनि बसिरहका छन्।

जुम्लामा पनि केही मतपेटिका संकलन गर्न बाँकी छ। संकलित मतपेटिका नयाँ बनेको जिल्ला अदालतको भवनका चार वटा कोठामा राखिएको छ।

हुम्लाको लिमीका ६ वटा केन्द्रका मतपेटिका हेलिकप्टरबाट संकलन भइरहेको छ। साँझसम्म सबै मतपेटिका संकलन गरेर जिल्ला अदालतको भवनका तीन वटा कोठामा भण्डारण गरिने जिल्ला निर्वाचन कार्यालयले जनाएको छ।

मुगुमा पनि मंगलबार साँझमात्र मतपेटिका संकलन हुने भएको छ। जिल्ला निर्वाचन कार्यालयका अनुसार जिल्ला अदालत भवनका तीन कोठामा मतपेटिका राखिनेछ। हरेक कोठामा एक/एक जना सशस्त्र प्रहरी बलका जवानले सुरक्षा दिने छन्।

दार्चुलामा मतपेटिका संकलन जारी छ। संकलित मतपेटिका खलंगास्थित कर्मचारी आवास भवनका छ कोठामा राखिएको छ।

जिल्ला निर्वाचन कार्यालय बैतडीका अनुसार साँझसम्म १८२ वटै केन्द्रका मतपेटिका संकलन गर्ने गरी काम भइरहेको छ। संकलति मतपेटिका दशरथचन्द नगरपालिकाको हलमा राखिएको छ।

बझाङको मतपेटिका संकलन पनि हेलिकप्टरमार्फत् भइरहेको छ। संकलित मतपेटिका चैनपुरस्थित जिल्ला पशुसेवा कार्यालयको भवनमा राखिएको छ।

बाजुराका प्रमुख जिल्ला अधिकारी लुकबहादुर क्षेत्रीका अनुसार सोमबार साँझसम्म मतपेटिका संकलन सकिनेछ। संकलित मतपेटिका जिल्ला समन्वय समितिको भवनमा राखिएको छ।

‘भित्र प्रहरी र सशस्त्रले सुरक्षा दिन्छन्, दलका प्रतिनिधि पनि बस्ने भन्नुभएको छ,’ प्रजिअ अधिकारीले भने, ‘उहाँहरु बस्ने भए बाहिर पाल टाँगेर बस्ने कि भन्ने कुरा भइरहेको छ।’