इलाम । इलाम नगरपालिका ८ तिल्केनीमा वेवारिसे अवस्थामा फेला परेको हतियारको अनुसन्धानको क्रममा नेपाल प्रहरीले ६ जनालाई पक्राउ गरेको छ । घटनाको क्रममा प्रयोग भएको ३ थान इन्डियन पेस्तोल, ८ राउण्ड सोही पेस्तोलमा लाग्ने गोली सहित ९० लाख १० हजार रकम बरामद भएको छ ।
घटनामा संलग्न रहेका मुख्य नाईके पाँचथर फल्गुनन्द गाउँपालिका वडा नं. १ वस्ने ३२ वर्षीय राजवहादुर तामङ, फिदिम नगरपालिका १० वस्ने ३३ वर्षका भयप्रसाद विक, पाँचथर फालेलुङ गाउँपालिका ८ वस्ने ५४ वर्षीय महेन्द्र कुमार दर्जी, फाल्गुन्नद गाउँपालिका ४ का ४४ वर्षीय रुद्रकुमार नेम्वाङ र फाल्गुनन्द गाउँपालिका ६ का ६० वर्षीय योगेन्द्रप्रसाद आङ्दाम्वेलाई इलाम बजारबाट पक्राउ परेका हुन ।
सोही घटनामा संलग्न विर्तामोडका योगेश राईलाई पनि झापा जिल्ला प्रहरी कार्यालयले पक्राउ गरेर अनुसन्धान भई रहेको इलामका प्रहरी प्रमुख विपिनकुमार कर्माचार्यले जानकारी दिनुभयो ।
मंसिर २५ गते राति इलामको तिल्केनीमा भएका लुटपाटको घटनालाई अनुसन्धानको क्रममा सो घटना नक्कली भएको र पक्राउ पर्ने घटनाका योजनाकार राजवहादुरले योजनाबद्ध तरिकाले सो घटना घटाएको पनि अनुसन्धानमा खुलेको कर्माचार्यले बताउनुभयो ।
योजनाकार तामाङले आफुसँग वहुमुल्य रत्न छ भनि पाँथरका राजेन्द्र रिजाल, तारा भट्टराई र डिल्ला ढुङ्गानाबाट २ करोड २७ लाख ५८ हजार र ६० लाख मुल्य पर्ने जग्गा रकम ठगेका थिए । ठगिएकाहरुले जिल्ला प्रहरी कार्यालयमा किटानी जाहेरी दिएका थिए । ठगेको रकम लुटिएको देखाउनलाई सो घटनाको योजना गरेको पनि खुल्न आएको छ ।
