मंसिर १३, २०७४-भारतका लागि मिस वल्र्डको उपाधि जितेका ऐश्वर्या राय र प्रियंका चोपडा बलिउडमा पनि राम्रै किसिमले सफल भएका छन् । उनीहरूका पछि डायना हेडन र युक्ता मुखीले पनि अभिनेत्रीका रूपमा छोटो परिचय बनाए । विश्वसुन्दरीहरूको यस्तो पृष्ठभूमि रहेकाले, हालै चीनको सान्या सहरमा आयोजित मिस वल्र्डको उपाधि जितेकी मानुषी छिल्लरलाई पनि बलिउड प्रवेशसम्बन्धी प्रश्न सोधिनु नौलो होइन । शनिबार जन्मघर फर्किएकी २० वर्षीया सुन्दरीले एउटा पत्रकार सम्मलेनमा अहिले बलिउड प्रवेश गर्ने कुनै योजना नभएको बताएकी छन् ।
हरियाणाकी मेडिकल विद्यार्थी मानुषीको भनाइलाई उद्धृत गर्दै भारतीय मिडियामा लेखिएको छ, ‘अहिलेको लागि बलिउड प्रवेशको कुनै योजना छैन, म यसबारेमा केही भन्न पनि सक्दिनँ ।’ बरु उनी आफ्नो कार्यकालमा रजस्वला र सरसफाइसम्बन्धी मेडिकल तालिम र क्याम्पेन चलाउने योजनामा छिन् । ‘सेनेटरी प्याड हरेक महिलाको लागि आवश्यक कुरा हो,’ उनले भनेकी छन्, ‘त्यसैले यो कम मूल्यमै उपलब्ध हुनुपर्छ । महिलाहरूका लागि सुरक्षित र सहज रूपमै रजस्वला सरसफाइ व्यवस्थापनको पहुँच हुनुपर्छ ।’
मिस वल्र्डका रूपमा उनको कार्यकाल एक वर्षको रहनेछ । यो अवधिमा चार महादेश घुमेर महिलाहरूलाई रजस्वला र शारीरिक सरसफाइबारे सचेतना फैलाउने आफ्नो योजना रहेको उनले सञ्चारकर्मीमाझ भनिन् ।
तर मानुषीसँग बलिउड प्रवेशको योजनै नभएको भने हैन । उनको विसलिस्टमा आमिर खानसँग फिल्म खेल्नु पनि रहेको छ । ‘म आमिर खानको फिल्ममा काम गर्न चाहन्छु , किनकि उहाँसँग एकदमै चुनौतीपूर्ण रोलहरू छन्,’ उनले भनेकी छन्, ‘उहाँको फिल्ममा समाजसँग जोडिएको सन्देश हुन्छ । त्यसैले उहाँसँग काम गर्नु एकदमै रोचक हुन सक्छ ।’
अभिनेत्रीहरूमध्येचाँहि उनलाई प्रियंका मन पर्ने रहिछन् । प्रियंकापछि भारतका लागि मिस वल्र्डको उपाधि जित्ने मानुषी छैटौं सुन्दरी हुन् ।
